剛普朗克(Gangplank)係遊戲英雄聯盟(League of Legends)入面嘅元祖角色之一，自2009年已經喺遊戲入面。雖然剛普朗克曾經喺2015年被重製，不過被玩家俗稱為「食橙」嘅W技—「壞血症療法」就無改變，一齊認識下招式背後嘅典故。 壞血症(scurvy)係一種喺十七至十八世紀流行嘅疾病，病人大多數係水手或海盜等長時間航海嘅人，構成壞血症嘅原因源於身體缺乏維他命C。維他命C能夠協助原膠原蛋白(procollagen)串連成三股螺旋(triple helix)，呢個過程係組成膠原蛋白(collagen)嘅前置步驟。
Credit: MedPartner
膠原蛋白係人體結締組織(connective tissue)嘅主要成份，同時亦係皮膚、血管、骨頭同軟骨等組織嘅一部份。
Credit: Osen Health & Beauty
缺乏維他命C會令身體無法製造膠原蛋白，導致壞血症患者出現牙齦腫脹、皮膚出血、傷口難以癒合等症狀。 由於人類喺演化過程中失去咗自行製造維他命C嘅基因，因此必需要從食物吸收維他命C。然而，以往船員出海航行並唔會攜帶蔬菜同水果等難以保鮮嘅食物上船，令到佢哋喺幾個月嘅航程入面都無法攝取維他命C。
當年嘅醫生並唔清楚壞血症嘅成因，直到英國皇家海軍醫師林德(James Lind)偶然發現檸檬汁能夠治療壞血病。林德嘅療法起初並未受到重視，直至林德死後英國海軍終於採用佢嘅建議，將少量檸檬汁加入酒俾軍人飲用，正式解決壞血症困擾。
言歸正傳，剛普朗克喺遊戲入面嘅身份係一個海盜，技能所描述嘅柑橘類水果同檸檬一樣都含有維他命C，能夠協助預防壞血症，所以呢招嘅設計符合角色背景，亦有科學根據。
時至今日，隨住保鮮技術嘅提升加上新鮮蔬果唾手可得，現代人亦基本上唔需要擔心壞血症。
Comments