終於捱過五日工作日嚟到星期六啦！有無plan到今晚去邊到玩呢？唔少人會揀星期六晚約朋友飲返杯酒chill下，但會飲到醉嘅你就要小心會患上「週末夜症候群」！
｜「週末夜症候群」？
週末夜麻痺症候群(Saturday Night Palsy Syndrome)，又稱腕垂症。患者會岀現麻痺、乏力，以及無法做岀舉直手腕、伸直手指等動作。但點解呢個病症會同飲酒有關？
但點解呢個病症會叫週末夜症候群，又點解同飲酒有關？
一到週末狂歡夜，相信大家都見識過，當人喺飲醉酒後，會無意識地以各種奇形怪狀嘅睡姿瞓着，例如係將成隻手掛喺椅背上，或者用手枕住個頭等。呢啲姿勢會分別施壓喺腋下、手臂「螺旋溝」位置，而今次故事嘅主角—橈神經(Radial nerve)正正就會經過呢兩個位置，一直延伸到手部。橈神經會因受到整晚嘅擠壓而受損，從而引發麻痺，甚至失去伸直手腕嘅功能，岀現手部垂落嚟嘅情況，所以亦稱做「腕垂症」。
除咗飲醉酒之外，如果同伴侶一齊瞓嘅時候，隻手臂被對方瞓住，同樣好容易擠壓到手臂「螺旋溝」位置嘅橈神經，而患上同樣情況，所以又稱「蜜月手」。
｜治療方法
不過大部分嘅患者都可以喺配合物理、職業治療後完全復原，例如物理治療方面會運用肌肉電療，去防止肌肉因失去神經刺激而萎縮；職業治療方面亦會按需要製定康復支架將手固定喺一個有助復原嘅位置，再配合手部功能性訓練，令患者可以盡早復原，重拾日常生活能力。
一個睇落好日常嘅動作，都有機會引致失去手部嘅功能。所以，如果身邊有伴侶，或者朋友經常飲醉酒嘅話，就share篇文提提佢小心患上「週末夜麻痺症候群」啦！
Comments