提到冬至，相信大家呢刻都係諗緊一陣幾點可以收工，又或者係今晚餐團年飯有咩好餸食。不過你又知唔知道冬至(winter solstice)除咗係傳統節氣之外，原來更加係一個年度天文現象？
地球嘅季節變化係源於地球擁有傾斜嘅自轉軸（約23.5°）。當地球圍繞太陽公轉時，南半球或北半球其中一面會因為地球處於傾斜狀態而面向太陽，令嗰面比另一面能夠獲得更多陽光；當地球公轉到軌道嘅另一邊時，原本面向太陽嘅半球就會成為背向太陽嘅一面。
根據定義，一個半球面向太陽嘅日子屬於夏季；背向就屬於冬季。對於北半球而言，冬至係一年入面北半球距離太陽最遠嘅一日，因此冬至嘅日照時間屬於全年最短。相反，南半球今日就會獲得全年最長嘅日照時間。
依照地球嘅公轉週期，北半球嘅日照時間將會喺冬至後開始逐漸增加，直到夏至當日(summer solstice，6月20/21日)變到最長，所以大家由聽日開始就可以享受更多陽光。 而睇完呢篇文嘅你今晚食團年飯就有一個冷知識可以同家人分享喇！
Comments