港理知系列：「腦囟都未閂埋」

身為香港人，當聽到有人講嘢唔經大腦嘅時候就會好順口咁拋岀幾句on_、傻_（呢到健康台，請自行補上~）。而上一輩嘅人就好常會用「你真係腦囟都未閂齊」話啲後生嘅思想唔成熟。到底人嘅腦囟（音：seon3 迅）係幾時先閂埋，如果太早或太遲閂埋又會唔會有危險？

腦囟係咩嚟？

人嘅頭顱由8塊頭骨組成，而腦囟，亦稱囟門（fontanelle），係指頭骨同頭骨之間嘅骨縫交叉處。人嘅頭顱共有6個囟門，而最明顯嘅囟門有2個，分別係「前囟門」、「後囟門」。

前囟門呈菱形，位於頭部前方嘅額骨（Frontal bone）同頂骨（Parietal bone）之間。前囟門大概喺嬰兒岀生後12-18個月內隨住骨縫骨化而閉合。

後囟門呈三角形，比前囟門細，位於頭部後方枕骨（Occipital Bone）同頂骨（Parietal Bone）之間。後囟門大多喺嬰兒岀生前，或岀生後六至八週就會閉合。

但點解囟門唔喺嬰兒岀世前就完整咁生成？原因有兩個：

1. 分娩時，未閉合嘅囟門令嬰兒嘅頭骨可以有重疊嘅空間，咁樣嬰兒嘅頭部就可以安全地從狹窄嘅陰道中擠岀嚟。

2. 嬰兒嘅腦部喺岀生後會迅速發展，未閉合嘅囟門令頭髗內可以有更多空間去容許腦部及其他支持腦發部展嘅細胞生長。

由於囟門正常只會喺嬰孩時期先未閉合，所以啲人就會以「腦囟未閂」去形容人思想仲好似小朋友咁未成熟。

「腦囟未閂」可大可小

囟門嘅閉合情況亦代表住嬰孩嘅健康狀況，太遲閉合可能代表小朋友岀現唐氏綜合症、先天性甲狀腺機能低下症、佝僂病、腦積水等病症。但太早閉合亦可能係代表基因異常，更有機會限制腦部發展空間，而導致智力發展障礙。所以「腦囟都未閂齊」除咗係一句話人嘅說話之外，仲係用作觀察小朋友發展狀況嘅重要指標嚟㗎。

Reference:

Lipsett BJ, Reddy V, Steanson K. (2022, July 25). Anatomy, head and neck, Fontanelles - StatPearls - NCBI Bookshelf. Retrieved January 29, 2023, from https://www.ncbi.nlm.nih.gov/books/NBK542197/