中庸之道：不偏不倚、無過與不及的處事態度 —《論語》 中庸之道係中國文化入面經常提及嘅一種思想，主張凡事都應過猶不及，適可而止。無獨有偶，生物學上亦有一個概念同呢種精神互相呼應，一齊睇下我哋嘅身體係點樣實踐「中庸之道」。 體內平衡(Homeostasis)係身體各個器官同系統互相協調，從而達至內在穩定嘅一種生理狀態。維持體內平衡能夠為身體提供最合適嘅環境進行新陳代謝，例如理想嘅溫度同酸鹼度對於酶反應(Enzymatic reaction)非常重要，因此維持呢個狀態係生物生存嘅必要條件之一。 為咗應對外來環境對體內平衡帶來嘅改變，身體會持續透過負回饋機制(Negative feedback)抵消轉變。負回饋機制嘅概念同恆溫冷氣機嘅運作原理相似，一旦室內溫度高過/低過用家所設定嘅溫度，冷氣機就會做出相對應調整去降低/提升室溫，令溫度重新回到目標範圍。
以調節體溫(Thermoregulation)為例，人體核心溫度嘅理想範圍大約係攝氏36-37度。當皮膚表面溫度高於核心溫度時，下丘腦(Hypothalamus)就會觸發流汗、血管擴張等反應散熱；相反，當皮膚表面溫度低於核心溫度時，下丘腦就會觸發打冷震(shivering)、血管收縮等反應提升表面溫度。
除咗體溫之外，身體其他重要嘅指標亦都會透過負回饋機制進行調節，以確保身體能夠維持體內平衡：
胰臟細胞會因應血糖水平而釋放胰島素/升糖素(Glucagon)以降低/提升血糖；
腦下垂體(Pituitary gland)會釋放抗利尿激素(Antidiuretic hormone，ADH)促進腎臟回收水份，從而減少水份流失；
當身體嘅二氧化碳水平上升時會導致血液pH值下降，驅使延腦(Medulla oblongata)增加肺部呼吸頻率及深度，令身體加快排出二氧化碳。
唔少慢性同急性疾病嘅成因都係源於負回饋機制出現問題，以致身體無法維持體內平衡，例如1型糖尿病源於胰臟細胞無法製造胰島素；中暑源於散熱機制唔足以幫助身體降溫等。由此可見，「中庸之道」唔單止係一種處世態度，更加係生存嘅法則。
コメント