本篇文章含有極少量劇透，不過有關劇情情簡之中嘅不解，歡迎dm/comment同電影迷小編討論。
上星期六終於都有機會去睇小編期待已久嘅Tenet，除咗係因為小編Christophor Nolan嘅忠實影迷之外，亦都係因為網上傳聞套戲會好難明。而事實的確係成套戲都冇冷場，係一套非常成功嘅科幻諜戰片。不過，比起Nolan前作“Interstellar”，今次比較少科學元素，取而代之嘅係利用物理學其中一個學説作為基礎，拍攝出一套嘆為觀止嘅電影，而小編所講嘅學說就係——熱力學，仔細啲來講就係熱力學第二定律。
唔好聽到熱力學就走先得㗎！
熱力學雖然係掌管全宇宙嘅基礎學說之一，但係我地只會要好簡單咁解釋一次，就已經足夠明白“Tenet”背後嘅科學。
首先我地要明白熱力學第二定律，定律説明咗熱力學嘅不可逆性，已發生並過去咗嘅事就係過去咗。
定律嘅指標就係大名鼎鼎嘅「熵」 (Entropy)。熵描述一個系統嘅混亂程度，由可用嘅能量轉變為不可用嘅能量，例如燃燒，爆炸，一杯水變凍，甚至係你做完運動，都會令熵嘅數值增加（圖二）。如果將整個宇宙當作為一個孤立系統 (Isolated System)嘅話，咁宇宙整體嘅熵只會向住最大值進發，換句話講成個宇宙只會越嚟越混亂。
而因為熵永遠唔會反轉方向前進，所以亦可以話熵就係時間嘅化身。其實諗深一層，所謂時間其實只不過係人類想像出黎嘅野，真正存在嘅就只有宇宙每一刻嘅混亂程度。
Tenet裏面又係點？
電影裏面表示未來嘅人類搵到將時間倒流嘅方法，通過將旋轉門裏面嘅事物嘅熵逆向。而然，當整個宇宙都仲係向熵最大值前進，只有旋轉門入面嘅人係逆向嘅時候，就會産生時間倒流嘅錯覺。
現實又有冇可能？
至今都未出現違反熱力學第二定律嘅先例，不過，咁樣嘅假設都係企係一個宏觀嘅角度。隨着時間嘅推移科學家亦都開始搵到熱力學裏面嘅漏洞。而最大嘅漏洞亦都係黎自熱力學嘅支柱理論：H定理 (H Theorem) 。
H定理嘅出現其實係證明熱力學第二定律嘅真實，所以成為咗定律嘅一部份。H定理解䆁一樣好簡單嘅現象：熱平衡嘅過程，一個熱同一個凍嘅物件接觸後變暖中間發生嘅事。
但係科學家冇辦法記錄每一粒粒子每一刻嘅能量同移動路徑，所以科學家只能從宏觀嘅角度去觀察熱平衡嘅過程。亦都係咁，呢個定理裏面提出，某些情況之下，某一粒粒子之中，熱平衡嘅過程裏面的確會有熵數值變細嘅情況發生 。
假想實驗時間！
講旋轉門之前，仲要講埋「馬克士威爾嘅惡魔」，一個由19世紀物理學家馬克士威爾提出嘅假想實驗。試想像一個好得閒冇野做嘅惡魔，企咗係兩個箱外面，控制箱之間嘅一個閘。
因為個惡魔可以觀察到每一粒粒子嘅狀態，而佢又真係好無聊，所以佢決定當高速移動嘅粒子由左面向右面嘅箱移動嘅時候，佢就會打開個閘。相反，慢嘅粒子就會由右邊嘅箱去左邊嘅箱。
隨住時間流逝，左邊嘅箱就會淨底快嘅粒子，右邊嘅相就會剩低慢嘅粒子。惡魔係冇直接影響啲粒子嘅情況下，成功將混亂嘅系統變成一個有秩序嘅系統，令熵嘅數值變細。
旋轉門咁點？
如果依照以上嘅說法，旋轉門就係假想實驗裏面嗰個惡魔，把握到熱力學定律嘅漏洞，有系統咁將門入面嘅事物嘅熵逆轉。當中嘅科技係點樣達成呢樣野，電影裏面冇提及過，現實亦都無從入手。
所以都係話，Try not to understand it, feel it。
文中所提及到嘅知識黎自以下學科：
如果想知道更多，可以不妨搜尋下以下字眼：
Reference:
小編’s textbook
Comments