Netflix熱門劇《非常律師禹英禑》中由朴恩斌飾演嘅女主角禹英禑，係一位患有自閉症嘅岀色律師。當聽到自閉症，或者大家會即刻聯想到缺陷，但原來有自閉症亦可以好似女主角咁做到天才？
點為之自閉症？
根據《精神疾病診斷與統計手冊第五版》（DSM-5），自閉症類群障礙 (Autistic Spectrum Disorder，ASD)會按下列臨床行為作診斷：
1️⃣社交、社會活動上有缺損
🎥喺劇集入面，禹英禑同陌生人相處時經常岀現唔自在嘅情況，亦會有表達上嘅困難。
2️⃣侷限而且重覆嘅行為、興趣同活動、對外界刺激反應過高或過低
🎥喺劇集入面，禹英禑會習慣性地調整紙巾嘅擺放角度、經常重覆其他人講過嘅說話、就算食大餐時都一樣揀食紫菜飯卷、對於法律條文同鯨魚話題有高度興趣、難以忍受爭吵嘅聲音等。
3️⃣症狀必須喺童年時期岀現
早於一歲前已經可以從同嬰兒嘅互動中發現自閉症徵兆。
🎥喺劇集入面，禹英禑細個時對其他人嘅叫喚都無反應，亦無表情、第一次發言嘅年紀比同齡人遲得多。
自閉症=能力低？
《非常律師禹英禑》其中一單案件中嘅弟弟患有自閉症，弟弟並無辦法完整地表達句子，所以令弟弟嘅屋企人對於女主角都有自閉症但可以成功做到律師而覺得諷刺。事實上，自閉症亦有高低功能之分。高功能自閉症（High Function Autism）較具有語言能力，擁有較高學習能力，更有機會比同齡嘅一般人有更強嘅記憶力、觀察力等；但言語表達、人際互動上仍然會有障礙。
現實版「禹英禑」
美國佛羅里達州嘅Haley Moss 3歲時就識得閱讀同拼圖，但到4歲識得先開口表達，到醫院檢查後被診斷為高功能自閉症。Haley大個後考入University of Florida，取得犯罪與心理學學位，其後更考上University of Miami School of Law，最終成功考取律師執照。
自閉症面對的社會問題
由於自閉症患者唔擅長同外界接觸，往往容易被誤解、歧視，甚至欺凌。而喺納粹時期，自閉症患者甚至被分類為唔值得生存，被送到毒氣室大批屠殺。從歷史走到現今，自閉症或其他身心障礙人士除咗要為自身難題努力外，亦面對住各種外界因歧視構成嘅壓力。社會嘅包容同正確嘅理解，能夠讓自閉症人士活得更自在，同普通人一樣享有平凡但難得嘅生存空間。
Reference:
American Psychiatric Association. (2013, May 18). DSM. Psychiatry.org - DSM. Retrieved September 18, 2022, from https://psychiatry.org/psychiatrists/practice/dsm
Comments