2020年派台嘅《鯨落》係Ian陳卓賢嘅代表作之一。事隔三年，「鯨落」又有幸受到關注，被考試局選中成為今年文憑試生物科試題之一。一齊認識下呢個官方認證嘅課題。
「海魚即管吃喝 遺愛後葬於海溝這軀殼」 顧名思義，鯨落(Whale fall)係鯨魚死亡後屍體沉沒到海底深處嘅過程。由於缺乏太陽光，海底深處生物並無法利用光合作用產生能量，只能夠依賴由海面沉殿至海底嘅有機物碎片(海雪，Marine snow)作為營養來源。
作為食物鍵嘅頂端生物，鯨魚軀體非常龐大，整具屍體直至完全分解前會經歷幾十年以上時間，所以鯨落會為海底生物帶嚟大量營養，甚至創造出一個獨特嘅生態系統。整個鯨落過程可以分為三個階段：
食腐動物(Scavenger)例如鯊魚同盲鰻(hagfish)會食用鯨魚屍體上嘅軟組織；
甲殼同軟殼動物會緊隨其後佔據鯨魚嘅骸骨，食用殘留喺鯨魚身上同附近海床嘅組織；
細菌會分解鯨魚骸骨入面所儲存嘅油脂，並釋放硫化氫(Hydrogen Sulphide)。硫氧化菌(Sulfur oxidizing bacteria)能夠利用硫化氫作為能量來源製造有機物，從而養活其他捕食微生物或與微生物共生嘅物種。
Credit: NOAA's Office of National Marine Sanctuaries
經歷過上述階段後，鯨魚遺留嘅骸骨最後會變成一個穩固嘅表面，有助濾食性動物(Filter feeder)例如海綿、青口等物種喺海床上棲息。
「落下淚捨身替你成大志」
除咗孕育深海物種外，鯨落對於減低碳排放亦有正面幫助。根據海洋學家估算，每條鯨魚一生可以累積多達33噸二氧化碳，作為比較，每棵樹每年只能夠吸收48磅。當鯨魚死亡後，佢哋身上所儲存嘅二氧化碳就會伴隨屍體一齊被埋藏到海洋深處，達至碳封存(Carbon sequestration)嘅效果。
有見及此，國際貨幣基金組織就喺2019年提出保育鯨魚作為低成本嘅方法應對全球暖化。然而，過去幾十年嘅商業捕鯨行動早已令到鯨魚數量大不如前。如果要守護鯨魚嘅將來，就必須依靠世界各國一齊合作。
Sources:
Comments