流落荒島係唔少電影同電視劇嘅經典情節。除咗驚險嘅求生劇情外，劇本往往都會加插感情線，描寫本來互無好感嘅男女主角點樣喺流落過程產生情愫，最後開展一段浪漫同轟烈嘅愛情。
唱作歌手陳蕾嘅作品《荒島之幻象》亦都借鑑咗呢個題材，刻劃兩個人之間唔理性但又無法壓抑嘅感情。藉著呢首作品，今次想同大家探討一下點解流落荒島會令人刷出愛火。
「荒島中有你伴我蹉跎 可算不枉」
根據一個名為單純曝光效應(mere exposure effect)嘅心理現象，人會傾向對較為熟識嘅事物產生好感。喺人際關係方面，呢個現象會令我哋對經常出現嘅人產生好感，例如係鄰居或者一齊上堂嘅同學等等，即使我哋唔認識對方。 流落荒島為男女製造朝夕相對嘅機會，兩人無意中就可能因單純曝光效應嘅影響而喜歡對方，亦即係所謂嘅日久生情。事實上，呢種情況喺現實生活並唔罕見，例如辦公室戀愛就係其中一種男女之間因經常見面而促成嘅關係。
「也許這生物都很脆弱到周遭要寄託」
吊橋效應係另一個會令人產生錯覺嘅現象。呢個現象源自一個1974年進行嘅實驗，參與實驗嘅男士被分成兩組，一組要喺較危險嘅吊橋上做訪問，而對照組就喺較安全嘅木橋上面做訪問。實驗結果發現吊橋組嘅男士有較高機會喺實驗結束後繼續聯絡女訪問員。
造成呢個結果嘅原因同生理反應錯誤歸因(misattribution of arousal)有關。企喺吊橋上做實驗會令男士感到緊張、心跳加速。呢類生理反應會引起錯誤嘅心理認知，令男士誤以為係眼前嘅女訪問員令自己心動。
同樣道理，身處充滿危險嘅荒島都會令人感到不安同恐懼，從而觸發吊橋效應。面對未知嘅環境，異性嘅陪伴能夠提供安全感，但呢一種感覺可能會被內心錯誤解讀成屬於愛情所產生嘅幸福感，使男女誤以為對方就係合適嘅另一半。
「互取溫暖 帶不走 切不斷 多麼的繾綣」
最後，荷爾蒙亦都係令感情升溫嘅因素。喺荒島上生活會拉近男女之間嘅距離，彼此嘅互動同身體接觸會刺激腦下垂體後葉(posterior pituitary)分泌催產素(oxytocin)。催產素可以降低壓力荷爾蒙皮質醇(cortisol)嘅水平，並提升人嘅信任、同情心及連繫。
呢種荷爾蒙對於維繫兩性關係有明顯作用，實驗發現催產素水平較高嘅情侶會有較親密同愉快嘅互動，攝取催產素後嘅男士亦會願意表達更多情感。學者推斷呢一個改變可以改善男士與另一半嘅溝通，從而有助解決情侶之間嘅衝突。
コメント