如果《自毀的程序》流露嘅係絕望，咁《從零開始的新世界》象徵嘅就係希望。一改既有風格，柳應廷嘅新作以正能量引領大家走入幻想國度，唔少樂迷聽完都形容感覺就好似去咗迪士尼。
一如以往，今期繼續以科學帶大家探索阿Jer嘅音樂世界。
「開～ 開一個盛世 開新的眼界」 演替(Succession)係一個生態學(Ecology)理論，呢個理論指出一個地方嘅物種結構會隨著時間而改變。 原生演替(Primary succession)會發生喺欠缺泥土、未曾被生物占據嘅地區，例如岩漿冷卻後所形成嘅岩石或冰川融化後暴露嘅地面上。喺原生演替前期，青苔(moss)、地衣(lichen)等生長速度快、生存能力高嘅先鋒物種(Pioneer species)會首先占據地區。先驅物種嘅生長同死亡能夠分解岩石，協助岩石累積有機物質，令土壤逐漸形成。部份先驅物種亦可以借助固氮細菌(Nitrogen fixing bacteria)將空氣中嘅氮轉化到泥土入面，為植物生長提供養份。
當土壤形成後，花草同灌木等較矮嘅植物就有合適嘅生長環境，從而吸引草食動物進入地區。隨著土壤嘅厚度同養份繼續增加，樹木會開始生長。由於樹木比起地面植物能夠接收更多陽光，所以樹木生高之後就會淘汰一部份地面植物，同時為其他動物例如鳥類提供棲息地方。
當地區入面嘅物種結構同外在環境達到平衡後，物種之間就會形成一個穩定、具生物多樣性並能夠自給自足嘅生態系統，例如草原、森林等。呢個狀態稱為頂級群落(Climax community)，亦係演替嘅最終階段。
Credit: uchicago news
「 為了栽種嫩芽 幽谷荒野被轉化」 除咗原生演替之外，次生演替(Secondary succession)亦係另一種演替形式。次生演替會發生喺受到外來侵襲，包括山火或伐木等自然災害及人類行為而導致群落減少嘅地區上。
Credit: uchicago news
次生演替當中經歷嘅轉變同原生演替大致相同。兩者嘅主要分別在於次生演替進行嘅地方喺受到破壞前已經擁有土壤，加上泥土入面仍然存有營養同種子，所以前者嘅發展速度會比後者快。
Comments