和理學流行文化：《一個女人和浴室》

《一個女人和浴室》MV

經歷完忙碌嘅一日之後，返到屋企沖一個涼享受下MeTime絕對係放鬆身心嘅最好方法。謝安琪嘅作品《一個女人和浴室》就唱出咗對於沐浴時光嘅嚮往。一齊認識下沖涼可以為身心帶嚟咩好處啦。

「由我 一個去伴著 一百枝乳霜

由我 一個發夢或淋浴 沒人在同享」

首先，沖暖水涼能夠提升身體表面溫度。當身體表面溫度上升時，下丘腦(hypothalamus)會觸發體溫調節機制，驅使身體排走熱力以維持體內平衡。由於人體需要一個較低嘅溫度先可以進入睡眠狀態，所以沖暖水涼帶嚟嘅降溫效果能促進睡眠。

一個由美國德克薩斯大學奧斯汀分校進行嘅研究發現，如果睡前一至兩個鐘用40-42.7度嘅暖水沖涼可以令入睡時間提前十分鐘，反映沖涼有助改善睡眠質素，令我哋能夠以更好嘅狀態迎接新一日。

「蓮蓬在給我 滋養

舊日我那樣期待 沒伴侶破壞寧靜的 晚上」

另一方面，沖涼對於提升創造力都非常重要。相信你可能曾經試過喺浴室入面突然靈感爆棚，成個腦都係天馬行空嘅諗法。咁係因為沖涼係一個唔太需要注意力嘅任務。進行呢一類任務會令大腦進入放空狀態，處於呢個狀態下，大腦嘅預設模式網路(Default Mode Network，簡稱DMN)會變得比平時更活躍。

DMN連接咗大腦多個領域，包括負責建立自我認知嘅內側前額葉皮質(medial prefrontal cortex)同負責擷取回憶嘅後扣帶皮層(posterior cingulate cortex)等。

「阿基米德的浴缸」雕像，收藏於以色列國家科學、技術及太空博物館。

活躍嘅DMN會令大腦不經意地將諗法串連一齊，幫助我哋創造出新思維。好似古希臘數學家阿基米德(Archimedes)就曾經試過喺浸浴嘅時候靈機一觸，諗到方法解決國王出俾佢嘅難題。而佢及後憑著呢個發現所提出嘅「阿基米德浮力原理」至今都仍然係流體力學入面嘅金科玉律，所以唔好睇小沖一次涼可以嘅帶嚟嘅改變呀！